Басни

Басните на Езоп (620 - 560 п.н.е.) и ден денес служат како морални поуки или наравоученија, а првенствено се наменети за децата. Служејќи се со ликовите и особините на животните, Езоп преку своите басни ги исмевал недостојните владари и моќници, но ја исмејувал и глупоста и алчноста, мрзата и негрижата, насилието и злобата. Езоп е почитуван е уште во античкиот период како создавач на басната. Во неговиот опус има околу 400 басни, создадени или обработени од него. Тие се популарни и се раскажуваат ширум светот и имаат трајна литературна вредност. Повеќето од басните донесуваат слики од животинскиот свет, но во некои од нив се раскажува и за растенија, предмети, луѓе, богови... Животот е прикажан реалистично, верно, со пораки на реалната животна филозофија која ја поседуваат луѓето со богато животно искуство и кои ги ценат и истакнуваат моралните вредности, но воедно се свесни дека во животот и природата владее правото на посилниот и попаметниот.Езоповите басни се пишувани во проза, со едноставен и јасен стил, а посебна привлечност им дава хуморот со кој се проткаени.